ആശ
നിവര്ത്തിയാല് നിവരാത്ത പുസ്തകങ്ങളും,
തള്ളിയാല് തുറക്കാത്ത വാതിലുകളും,
നാക്കിനു വഴങ്ങാത്ത വാക്കുകളും,
ചവച്ചാല് അരയാത്ത അപ്പങ്ങളുമാണെനിക്കിഷ്ടം.
ഉണങ്ങിക്കരിഞ്ഞ മരങ്ങള് കാണാനെന്ത് ചന്തം!
പൊട്ടിപ്പൊളിഞ്ഞ റോഡുകളും,
തകരാനായ പാലങ്ങളും.
മടിയനായ കുട്ടിയും,കുടിയനായ അച്ഛനും,
മയമില്ലാത്ത മാതൃത്വം,അസൗമ്യ കളത്രം.
അഴിമതിക്കാരനധികാരി,അസൂയക്കാരനാമയല്ക്കാരന്,
കൂറില്ലാത്ത കൂട്ടുകാരന്.
വിശപ്പ് നിറഞ്ഞ വയറുകള്.
ഒഴുക്കു നിലച്ച ഓലികള്.
അഴുക്ക് നിറഞ്ഞ അങ്ങാടി.
തെളിയാത്ത വിളക്കുമാടങ്ങള്.
കയറില് തൂങ്ങിയവനെ,
വിഷനീര് കുടിച്ചവനെ,
ഓര്ത്തെന്തിന് ദുഃഖിക്കുന്നു ?
വരണ്ടുണങ്ങിയ വയലുകള്ക്ക് തീ കൊളുത്തിയവന് മഹാന്.
വൃത്തമില്ലാത്ത കവിത,തന്തുവില്ലാത്ത കഥ,
ഉടഞ്ഞ കലങ്ങളും,
പൊളിഞ്ഞ പാത്രങ്ങളും,
മഷിയില്ലാത്ത പേനയും.
കൂടാത്ത മുറിവുകളും,
മാറാത്ത വേദനകളും.
കുറിക്കപ്പെടാത്ത ചരിത്രം.
താളം പിഴച്ച ഗീതങ്ങള്.
ചൂടില്ലാത്ത വെയിലും,
ഇരുട്ടില്ലാത്ത രാത്രിയും.
യുദ്ധങ്ങള് തുടരട്ടെ.......
അധിനിവേശം കൊഴുക്കട്ടെ........
ആര്ത്തി അതിരുകള് പൊളിക്കട്ടെ......
ഭൂമി കീഴ്മേല് മറിയട്ടെ...........
തകരട്ടെ സര്വ്വവും.................
ഉയിരെടുക്കട്ടെയീ അണ്ഠകടാഹത്തില്
പുതിയൊരു ഭൂമിയും, മനുഷ്യനുമെന്ന്
ആരും ആശിച്ച് പോകരുത്!!
No comments:
Post a Comment